ਫਤਹਿਗੜ ਸਾਹਿਬ, 14 ਮਈ(ਗੁਰਪ੍ਰੀਤ ਮਹਿਕ) ਅੱਜ ਪੰਜਾਬ ਦੀ ਸ਼੍ਰੋਮਣੀ ਅਕਾਲੀ ਦੱਲ ਬਾਦਲ ਦੀ ਪੰਥਕ ਕਹਾਉਣ ਵਾਲੀ ਸਰਕਾਰ ਅਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਬੰਧਕਾਂ ਨੂੰ ਉਸ ਸਮੇਂ ਭਾਰੀ ਨਾਮੋਸ਼ੀ ਦਾ ਸਾਮਣਾ ਕਰਨਾ ਪਿਆ ਜਦੋ ਬਾਬਾ ਬੰਦਾ ਸਿੰਘ ਬਹਾਦਰ ਵੱਲੋਂ ਸਰਹੰਦ ਫਤਹਿ ਦਿਵਸ ਦੇ ਤ੍ਰੈਸ਼ਤਾਬਦੀ ਜਸ਼ਨਾ ਮੌਕੇ ਆਯੋਜਿਤ ਇੱਕ ਰਾਜ ਪੱਧਰੀ ਸਮਾਗਮ ਦਾ 17 ਹਜਾਰ ਦੇ ਕਰੀਬ ਦੀ ਸਮਰੱਥਾ ਵਾਲਾ ਪੰਡਾਲ ਵੀ ਭਰਨਾ ਔਖਾ ਹੋ ਗਿਆ। ਭਾਵੇਂ ਕਿ ਸ਼੍ਰੋਮਣੀ ਅਕਾਲੀ ਦੱਲ ਅਤੇ ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਅਵਤਾਰ ਸਿੰਘ ਮੱਕੜ ਨੇ ਇੱਕਠ ਕਰਨ ਲਈ ਪੂਰਾ ਜੋਰ ਲਗਾ ਦਿੱਤਾ । ਅਖਬਾਰਾਂ ਵਿੱਚ ਵੱਡੇ ਵੱਡੇ ਇਸਤਿਹਾਰ ਦਿੱਤੇ ਪ੍ਰੰਤੂ ਫੇਰ ਵੀ ਅੱਜ ਪੰਡਾਲ ਭਰਨਾ ਔਖਾ ਹੋ ਗਿਆ। ਪੰਡਾਲ ਵੀ ਕਈ ਥਾਵੀ ਤਾਂ ਲੋਕ ਆਪਣੀ ਨੀਂਦ ਪੂਰੀ ਕਰਦੇ ਦੇਖੇ ਗਏ। ਆਪਣੀ ਨਾਮੋਸ਼ੀ ਨੂੰ ਲੁਕਾਉਣ ਲਈ ਸਾਬਕਾ ਕੇਂਦਰੀ ਮੰਤਰੀ ਅਤੇ ਸੀਨੀਅਰ ਅਕਾਲੀ ਨੇਤਾ ਸੁਖਦੇਵ ਸਿੰਘ ਢੀਂਡਸਾ ਨੇ ਕਿਹਾ ਕਿ ਕਈ ਪੱਤਰਕਾਰਾਂ ਤਾਂ ਇਹ ਕਹਿ ਰਹੇ ਹਨ ਕਿ ਸਮਾਗਮ ਵਿੱਚ 5 ਤੋ ਲੈ ਕੇ 10 ਲੱਖ ਦਾ ਇੱਕਠ ਹੈ ਪ੍ਰੰਤੂ ਢੀਂਡਸਾ ਸ਼ਾਇਦ ਇਹ ਭੁੱਲ ਗਏ ਕਿ 22 ਲੱਖ ਰੁਪਏ ਕੇ ਕਰੀਬ ਖਰਚ ਕਰਕੇ ਬਣਾਏ ਪੰਡਾਲ ਦੀ ਸਮਰੱਥਾ 17000 ਲੋਕਾਂ ਦੇ ਬੈਠਣ ਦੀ ਹੈ। (more…)
ਫਤਿਹਗੜ ਸਾਹਿਬ, 14 ਮਈ(ਗੁਰਪ੍ਰੀਤ ਮਹਿਕ) : ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਜੋਕਿ ਧਰਮ ਦੀ ਆੜ ਵਿੱਚ ਸਿਆਸਤ ਕਰਨ ਲਈ ਮਸ਼ਹੂਰ ਹਨ, ਨੇ ਅੱਜ ਜੁੱਤੀਆਂ ਪਾ ਕੇ ਹੀ ਅਰਦਾਸ ਵਿੱਚ ਸ਼ਾਮੂਲੀਅਤ ਹੋਏ। ਇਸ ਮੌਕੇ ਉਨਾਂ ਦਾ ਸਾਥ ਭਾਜਪਾ ਦੇ ਕੌਮੀ ਪ੍ਰਧਾਨ ਨੀਤਿਨ ਗਡਕਰੀ ਨੇ ਵੀ ਦਿੱਤਾ। ਭਾਵੇਂ ਕਿ ਭਾਜਪਾ ਪ੍ਰਧਾਨ ਨੇ ਆਪਣਾ ਸਿਰ ਦਾ ਕੇਸਰੀ ਰੁਮਾਲੇ ਨਾਲ ਢੱਕ ਲਿਆ ਪ੍ਰੰਤੂ ਅਰਦਾਸ ਦੌਰਾਨ ਉਨਾਂ ਜੁੱਤੀਆਂ ਉਤਾਰਨਾ ਵਾਜਬ ਨਾ ਸਮਝਿਆ ਜਦੋਕਿ ਸੁਖਬੀਰ ਬਾਦਲ ਨੇ ਆਪਣੀਆਂ ਜੁੱਤੀਆਂ ਉਤਾਰ ਦਿੱਤੀਆਂ ਸਨ। ਬਾਦਲ ਉਨਾਂ ਦੇ ਪੁੱਤਰ ਸੁਖਬੀਰ ਬਾਦਲ ਅਤੇ ਹੋਰਨਾਂ ਪਾਰਟੀ ਨੇਤਾ ਅੱਜ ਸ੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅਤੇ ਪੰਜਾਬ ਸਰਕਾਰ ਵੱਲੋਂ ਸਾਂਝੇ ਤੌਰ ਤੇ ਮਨਾਏ ਗਏ ਤਿੰਨ ਰੋਜਾ ਸਰਹਿੰਦ ਫਤਿਹ ਦਿਵਸ ਦੇ ਅੱਜ ਆਖਰੀ ਦਿਨ ਮਾਤਾ ਗੁਜਰੀ ਕਾਲਜ ਫਤਿਹਗੜ ਸਾਹਿਬ ਵਿੱਚ ਆਯੋਜਿਤ ਸਮਾਗਮ ਵਿੱਚ ਸ਼ਿਰਕਤ ਕਰਨ ਆਏ ਸਨ। ਤਖਤ ਸਾਹਿਬਾਨ ਨੇ ਕਈ ਜਥੇਦਾਰਾਂ ਨੇ ਵੀ ਸਮਾਗਮ ਵਿੱਚ ਸ਼ਿਰਕਤ ਕੀਤੀ। ਸਮਾਗਮ ਅਜੇ ਪੂਰੇ ਵੀ ਨਹੀਂ ਹੋਇਆ ਸੀ ਜਦੋ ਪਰਕਾਸ਼ ਸਿੰਘ ਬਾਦਲ, ਸੁਖਬੀਰ ਅਤੇ ਭਾਜਪਾ ਪ੍ਰਧਾਨ ਪ੍ਰੈਸ ਕਾਨਫਰੰਸ ਕਰਨ ਆ ਗਏ। ਇਨਾ ਨੇਤਾਵਾਂ ਨੇ ਇੱਕ ਤਰਾਂ ਪ੍ਰੈਸ ਕਾਨਫਰੰਸ ਸ਼ੁਰੂ ਹੀ ਕੀਤੀ ਸੀ ਜਦੋ ਉਨਾਂ ਨੂੰ ਪਤਾ ਲੱਗਾ ਹੀ ਅਰਦਾਰ ਹੋ ਰਹੀ ਹੈ। ਕੁਝ ਸਮੇਂ ਬਾਅਦ ਮੁੱਖ ਮੰਤਰੀ, ਸ਼੍ਰੋਮਣੀ ਅਕਾਲੀ ਦੱਲ ਦੇ ਪ੍ਰਧਾਨ ਅਤੇ ਭਾਜਪਾ ਪ੍ਰਧਾਨ ਅਰਦਾਸ ਵਿੱਚ ਸ਼ਾਮੂਲੀਅਤ ਕਰਨ ਲੱਗੇ ਪ੍ਰੰਤੂ ਮੁੱਖ ਮੰਤਰੀ ਅਤੇ ਭਾਜਪਾ ਦੇ ਕੌਮੀ ਪ੍ਰਧਾਨ ਨੇ ਆਪਣੀਆਂ ਜੁੱਤੀਆਂ ਖੋਲਣ ਦਾ ਕਸ਼ਟ ਨਾ ਕੀਤਾ। ਅਰਦਾਸ ਖਤਮ ਹੋਣ ਤੋ ਬਾਅਦ ਇਨਾ ਨੇਤਾਵਾਂ ਨੇ ਆਪਣੀ ਪ੍ਰੈਸ ਕਾਨਫਰੰਸ ਸ਼ੁਰੂ ਕਰ ਦਿੱਤੀ।