ਲੰਦਨ-ਸਾਲ 2009 ’ਚ ਬਰਤਾਨੀਆ ਦੀ ਨਾਗਰਿਕਤਾ ਪ੍ਰਾਪਤ ਕਰਨ ਵਾਲਿਆਂ ’ਚ ਭਾਰਤੀਆਂ ਦੇ ਮੋਹਰੀ ਹੋਣ ਦਾ ਪਤਾ ਲੱਗਦੇ ਹੀ ਬਰਤਾਨੀਆ ਦੀ ਨਵੀਂ ਸਰਕਾਰ ਗੈਰ ਯੂਰਪੀਅਨ ਯੂਨੀਅਨ ਦੇਸ਼ਾਂ ਜਿਵੇਂ ਕਿ ਭਾਰਤ ਆਦਿ ਤੋਂ ਪ੍ਰਵਾਸ ਘੱਟ ਕਰਨ ਲਈ ਵਚਨਬੱਧ ਹੋ ਗਈ ਹੈ। ਸਾਲ 2009 ਦੌਰਾਨ 26535 ਭਾਰਤੀਆਂ ਨੂੰ ਬਰਤਾਨੀਆ ਦੀ ਨਾਗਰਿਕਤਾ ਮਿਲੀ, ਜੋ ਕਿ ਸਾਰੇ ਦੇਸ਼ਾਂ ਤੋਂ ਵੱਧ ਹੈ। ਇਹ ਨਾਗਰਿਕਤਾ ਪ੍ਰਾਪਤ ਕਰਨ ਵਾਲਿਆਂ ਦਾ 13 ਫੀਸਦੀ ਹੈ ਅਤੇ ਪਿਛਲੇ ਸਾਲ ਨਾਲੋਂ ਇਸ ਅੰਕੜੇ ਵਿਚ 124 ਫੀਸਦੀ ਦਾ ਵਾਧਾ ਹੋਇਆ ਹੈ। ਬਰਤਾਨੀਆ ਦੀ ਨਾਗਰਿਕਤਾ ਪ੍ਰਾਪਤ ਕਰਨ ’ਚ ਪਾਕਿਸਤਾਨੀ ਦੂਸਰੇ ਸਥਾਨ ’ਤੇ ਹਨ। ਉਕਤ ਸਾਲ ’ਚ 20945 ਪਾਕਿਸਤਾਨੀਆਂ ਅਤੇ 12040 ਬੰਗਲਾਦੇਸ਼ੀਆਂ ਨੇ ਬਰਤਾਨੀਆ ਦੀ ਨਾਗਰਿਕਤਾ ਲਈ। ਇਸ ਤਰਾਂ ਭਾਰਤੀ ਉਪ ਮਹਾਂਦੀਪ ਵਿਚੋਂ ਹੀ 59,520 ਵਿਅਕਤੀਆਂ ਨੂੰ ਬਰਤਾਨੀਆ ਦੀ ਨਾਗਰਿਕਤਾ ਮਿਲੀ, ਜੋ ਕਿ ਕੁੱਲ ਨਾਗਰਿਕਤਾ ਪ੍ਰਾਪਤ ਕਰਨ ਵਾਲਿਆਂ ਦਾ 29 ਫੀਸਦੀ ਹੈ। ਅਵਾਸ ਮਾਮਲਿਆਂ ਦੇ ਮੰਤਰੀ ਡਾਮੀਆਂ ਗਰੀਨ ਨੇ ਕਿਹਾ ਕਿ ਪਿਛਲੇ ਸਾਲਾਂ ਤੋਂ ਚੱਲ ਰਹੀ ਅਵਾਸ ਨੀਤੀ ਨੂੰ ਬਦਲਿਆ ਜਾਵੇਗਾ ਅਤੇ ਹਜ਼ਾਰਾਂ ਦੇ ਇਸ ਅੰਕੜੇ ਨੂੰ ਘੱਟ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਆਉਂਦੇ ਕੁੱਝ ਦਿਨਾਂ ’ਚ ਅਸੀਂ ਇਸ ਲਈ ਪ੍ਰਬੰਧ ਕਰ ਦਿਆਂਗੇ ਅਤੇ ਇਸ ਲਈ ਵਰਕ ਪਰਮਿਟ, ਵਿਆਹ ਅਤੇ ਵਿਦਿਆਰਥੀਆਂ ਦੇ ਵੀਜ਼ੇ ਲਈ ਨਵੀਆਂ ਨੀਤੀਆਂ ਬਣਨਗੀਆਂ। ਦੱਸਣਯੋਗ ਹੈ ਕਿ ਬਰਤਾਨੀਆ ਦੀ ਨਵੀਂ ਗਠਜੋੜ ਸਰਕਾਰ ਯੂਰਪੀਅਨ ਯੂਨੀਅਨ ਤੋਂ ਬਾਹਰੋਂ ਹੋ ਰਹੇ ਪ੍ਰਵਾਸ ਨੂੰ ਘੱਟ ਕਰਨ ਦਾ ਐਲਾਨ ਕਰ ਚੁੱਕੀ ਹੈ, ਭਾਵੇਂ ਕਿ ਬਰਰਤਾਨੀਆ ਦੇ ਵਪਾਰ ਅਤੇ ਸਨਅਤ ਨਾਲ ਜੁੜ੍ਹੇ ਲੋਕ ਇਸ ਸੰਭਾਵੀ ਨੀਤੀ ਦਾ ਵਿਰੋਧ ਕਰ ਰਹੇ ਹਨ।