ਮੈਲਬਰਨ-ਅੱਜ ਤੜਕਸਾਰ ਪੂਰਬੀ ਮੈਲਬਰਨ ਵਿਚ 19 ਸਾਲਾ ਬੰਦੂਕਧਾਰੀ ਨੇ ਵਿਕਟੋਰੀਆ ਪੁਲੀਸ ਨੂੰ ਵਕਤ ਪਾ ਦਿੱਤਾ।‘ਦੀ ਏਜ’ ਅਨੁਸਾਰ ਸਵੇਰੇ 3 ਵਜੇ ਇਕ ਬੰਦੂਕਧਾਰੀ ਸਰਵਿਸ ਸਟੇਸ਼ਨ ’ਤੇ ਹਮਲਾ ਕਰਨ ਮਗਰੋਂ ਹੇਠਲੇ ਘਰ ’ਚ ਚਲਾ ਗਿਆ ਜਿੱਥੇ ਉਹ ਭੰਨ-ਤੋੜ ਕਰਨ ਮਗਰੋਂ ਸਾਮਾਨ ਚੋਰੀ ਕਰਕੇ ਫਰਾਰ ਹੋ ਗਿਆ। ਚੋਰੀ ਦੀ ਕਾਰ ’ਚ ਸ਼ਹਿਰ ਦੀ ਮੁੱਖ ਸੜਕ ’ਤੇ ਇਸ ਮੁਲਜ਼ਮ ਦੀ ਕਾਰ ਨੇ ਹੋਰ ਰਾਹਗੀਰਾਂ ਨੂੰ ਵੀ ਨੁਕਸਾਨ ਪਹੁੰਚਾਉਣ ਦੀ ਕੋਸ਼ਿਸ਼ ਕੀਤੀ। ਇਸ ਸਿਰਫਿਰੇ ਮੁੰਡੇ ਦਾ ਪਿੱਛਾ ਕਰਦਿਆਂ ਪੁਲੀਸ ਦੀਆਂ ਦੋ ਕਾਰਾਂ ਵੀ ਬੁਰੀ ਤਰ੍ਹਾਂ ਨੁਕਸਾਨੀਆਂ ਗਈਆਂ। ਮੁੰਡੇ ਵੱਲੋਂ ਕੀਤੀ ਹਵਾਈ ਫਾਇਰਿੰਗ ਦੀ ਘਟਨਾ ਮਗਰੋਂ ਪੁਲੀਸ ਨੇ ਉਸ ਇਲਾਕੇ ਨੇੜਲੇ ਅਦਾਰੇ ਬੰਦ ਕਰਵਾ ਦਿੱਤੇ। ਮੈਲਬਰਨ ਕ੍ਰਿਕਟ ਗਰਾਊਂਡ ਤੇ ਰਿਵਰ ਇਰੇਨਾ ’ਚ ਫੁਟਬਾਲ ਟੀਮਾਂ ਦਾ ਪ੍ਰੋਗਰਾਮ ਮੁਲਤਵੀ ਕਰਨਾ ਪਿਆ। ਅੱਜ ਸਵੇਰੇ ਤੋਂ ਹੀ ਪੁਲੀਸ ਵੱਡੀ ਗਿਣਤੀ ’ਚ ਇਸ ਮੁੰਡੇ ਨੂੰ ਭਾਲ ਰਹੀ ਹੈ ਪਰ ਖਬਰ ਲਿਖੇ ਜਾਣ ਤਕ ਡੇਵਿਡ ਪਾਲ ਰਾਓਨਟਰੀ ਨਾਂ ਦਾ ਇਹ ਮੁਲਜ਼ਮ ਫਰਾਰ ਸੀ। ਦੁਪਹਿਰ ਸਮੇਂ ਇਸ ਵੱਲੋਂ ਵਰਤੋਂ ਵਿਚ ਲਿਆਂਦੀ ਬੰਦੂਕ ਇਕ ਜਨਤਕ ਸਥਾਨ ਤੋਂ ਮਿਲੀ। ਹੁਣ ਤਕ 70 ਅਪਰਾਧਾਂ ’ਚ ਅੰਦਰ ਜਾ ਚੁੱਕਿਆ ਇਹ ਮੁਲਜ਼ਮ 1,50,000 ਡਾਲਰ ਦੇ ਜੁਰਮਾਨੇ ਦਾ ਦੇਣਦਾਰ ਹੈ।